ភ្នំពេញ៖ រដ្ឋាភិបាលកម្ពុជាមិនបានតម្រូវឱ្យភ្ញៀវទេសចរបង្ហាញសាច់ប្រាក់តាមខ្លួនចំនួន ១ពាន់ដុល្លារ ឬ ២ពាន់ដុល្លារ មុនចូលក្នុងប្រទេសកម្ពុជានោះទេ ប្រសិនបើមានករណីសាកសួរចំពោះភ្ញៀវទេសចរនោះ គឺជាសមត្ថកិច្ចរបស់មន្ត្រីជំនាញនៅច្រកទ្វារអន្តរជាតិប៉ុណ្ណោះ។
សេចក្ដីជូនដំណឹងនេះធ្វើឡើងបន្ទាប់ពីមានករណីបុគ្គលិកក្រុមហ៊ុនអាកាសចរណ៍មួយចំនួន បានសាកសួរភ្ញៀវទេសចរឱ្យបង្ហាញសាច់ប្រាក់ចំនួន ១ពាន់ដុល្លារ ឬ២ពាន់ដុល្លារ មុនអនុញ្ញាតឱ្យឡើងជិះយន្តហោះ។
តាមសេចក្ដីជូនដំណឹងរបស់ក្រសួងទេសចរណ៍ឱ្យដឹងថា «រាជរដ្ឋាភិបាលកម្ពុជា មិនមានគោលនយោបាយណាមួយតម្រូវឱ្យភ្ញៀវទេសចរមានសាច់ប្រាក់តាមខ្លួនចំនួន ១,០០០ដុល្លារ ឬ ២,០០០ដុល្លារ ដើម្បីអាចចូលប្រទេសកម្ពុជានោះទេ»។
សេចក្ដីជូនដំណឹងដដែលនេះបានបញ្ជាក់ថា ការសាកសួរភ្ញៀវទេសចរពីចំនួនទឹកប្រាក់យកតាមខ្លួន គឺជាសមត្ថកិច្ចរបស់មន្ត្រីជំនាញនៅច្រកទ្វារអន្តរជាតិ ដែលធ្វើឡើងតែចំពោះករណីសង្ស័យមួយចំនួនប៉ុណ្ណោះ និងមិនធ្វើឡើងជាទូទៅគ្រប់ភ្ញៀវទេសចរទាំងអស់ទេ។
ក្រសួងទេសចរណ៍អំពាវនាវដល់ភ្ញៀវទេសចរគ្រប់គ្នាគោរពតាមលក្ខខណ្ឌតម្រូវរបស់កម្ពុជា និងប្រកាសស្វាគមន៍ភ្ញៀវទេសចរមកទស្សនាកម្ពុជាផងដែរ។
គួររំលឹកផងដែរថា រដ្ឋលេខាធិការក្រសួងទេសចរណ៍ លោក ហោ សារុន ធ្លាប់បានបញ្ជាក់ថា ចំពោះបែបបទនៃការចូលប្រទេសកម្ពុជា គឺរាជរដ្ឋាភិបាលបានលើកលែងអស់ហើយនូវការបង្ហាញកាតចាក់វ៉ាក់សាំង ការធ្វើតេស្ដរហ័ស នៅសល់តែលិខិតបញ្ជាក់របស់គយ និងការស្នើសុំទិដ្ឋការនៅពេលមកដល់៕
